ವಿಜಯಪುರ: ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವೆ ಲಕ್ಷ್ಮಿ ಹೆಬ್ಬಾಳಕರ ಅವರು ಭ್ರಷ್ಟಾಚಾರದ ತುತ್ತ ತುದಿಗೆ ಹೋಗಿದ್ದಾರೆ. ಹಿಂದೆ ಮಾಡಿದ ಪಾಪದ ಫಲ ಅವರನ್ನು ಕಾಡುತ್ತಿದೆ ಎಂದು ವಿಜಯಪರು ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಕಿಡಿ ಕಾರಿದ್ದಾರೆ.
ವಿಜಯಪುರದಲ್ಲಿ ವಕ್ಫ್ ಕಾನೂನು ವಿರೋಧಿಸಿ ಹೋರಾಟ ನಡೆಸುತ್ತಿರುವ ಅವರು ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದರು.
ಬೆಳಗಾವಿಯಲ್ಲಿ ತಹಸೀಲ್ದಾರ್ ಕಚೇರಿಯಲ್ಲಿ ಎಫ್ ಡಿಎ ಆತ್ಮಹತ್ಯೆ ಮತ್ತು ಈ ಪ್ರಕರಣದ ಡೆತ್ ನೋಟ್ ನಲ್ಲಿ ಸಚಿವೆ ಲಕ್ಷ್ಮೀ ಹೆಬ್ಬಾಳಕರ ಪಿಎ ಸೋಮು ಹೆಸರು ಪ್ರಸ್ತಾಪ ವಿಚಾರ ಕುರಿತು ಅವರು ಖಾರವಾಗಿ ಪ್ರತಿಕ್ರಿಯೆ ನೀಡಿದರು.
ಸಚಿವೆ ಲಕ್ಷ್ಮೀ ಹೆಬ್ಬಾಳಕರ ಬಗ್ಗೆ ಸಾಕಷ್ಟು ದೂರುಗಳಿವೆ. ಅವರು ಭ್ರಷ್ಟಾಚಾರದ ತುತ್ತ ತುದಿಗೆ ಹೋಗಿದ್ದಾರೆ. ಹಿಂದೆ ಮಾಡಿದ ಪಾಪದ ಫಲ ಹೆಬ್ಬಾಳಕರನ್ನು ಕಾಡುತ್ತಿದೆ. ಬೆಳಗಾವಿಯಲ್ಲಿ ಈ ಹಿಂದೆ ಗುತ್ತಿಗೆದಾರ ಸಂತೋಷ ಆತ್ಮಹತ್ಯೆ ಮಾಡಿಕೊಂಡಾಗ ಅಂದು ಸಚಿವರಾಗಿದ್ದ ಕೆ. ಎಸ್. ಈಶ್ವರಪ್ಪ ಅವರ ವಿರುದ್ಧ ಆರೋಪ ಮಾಡಿದ್ದರು. ಅಲ್ಲದೇ, ಈಶ್ವರಪ್ಪ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡುವಂತೆ ಮಾಡಿದ್ದರು. ಡಿಕೆಶಿಯನ್ನು ಬೆಳಗಾವಿಗೆ ಕರೆಸಿಕೊಂಡು ರಾದ್ದಾಂತ ಮಾಡಿ ಈಶ್ವರಪ್ಪ ವಿರುದ್ಧ ಆರೋಪ ಮಾಡಿ ರಾಜೀನಾಮೆ ಕೊಡುವಂತೆ ಮಾಡಿದ್ದರು. ಈಗ ಆ ಪಾಪದ ಕೊಡ ತುಂಬಿದೆ ಎಂದು ಅವರು ಹೇಳಿದರು.
ಲಕ್ಷ್ಮಿ ಹೆಬ್ಬಾಳ್ಕರ ಬಗ್ಗೆ ಬಹಳ ಜನ ಹೇಳಿದ್ಧಾರೆ. ಬೆಳಗಾವಿಯಲ್ಲಿ ಭ್ರಷ್ಟಾಚಾರ ತುಂಬಿದೆ ಎಂದು ಹೇಳಿದ್ದಾರೆ. ಹೆಬ್ಬಾಳ್ಕರ ಪಿಎ ಹೆಸರು ಬಂದಿದೆ ಎಂದರೆ ಅದಕ್ಕೆ ಸಚಿವೆ ಹೆಬ್ಬಾಳಕರ ಹೊಣೆ. ಪಿಎಂ ಗಳಿಂದಲೇ ಸಚಿವರು ಹಣ ಸಂಗ್ರಹ ಮಾಡುತ್ತಾರೆ. ಸಚಿವೆ ಲಕ್ಷ್ಮೀ ಹೆಬ್ಬಾಳಕರ ನೈತಿಕತೆ ಹೊತ್ತು ರಾಜೀನಾಮೆ ನೀಡಬೇಕು. ಹಿಂದೆ ಈಶ್ವರಪ್ಪ ಬಗ್ಗೆ ಸುಳ್ಳು ಆರೋಪ ಮಾಡಿ ರಾಜೀನಾಮೆ ಕೊಡಿಸಿದ್ದೀರಿ. ಅದರ ಪಾಪದ ಕೊಡ ಬೆನ್ನು ಹತ್ತಿದೆ ಎಂದು ಅವರು ಹೇಳಿದರು.
ಸಚಿವ ಶಿವಾನಂದ ಪಾಟೀಲ ವಿರುದ್ಧವೂ ವಾಗ್ದಾಳಿ
ಇದೇ ವೇಳೆ, ಉಪ ಚುನಾವಣೆ ಬಳಿಕ ಬಿಜೆಪಿಯವರ ಹೋರಾಟ ಮುಗಿಯುತ್ತದೆ ಎಂದು ಸಚಿವ ಶಿವಾನಂದ ಪಾಟೀಲ ನೀಡಿರುವ ಹೇಳಿಕೆಯ ಬಗ್ಗೆಯೂ ಶಾಸಕರು ಕಿಡಿ ಕಾರಿದರು.
ಎಲ್ಲರೂ ಶಿವಾನಂದ ಪಾಟೀಲ ಅವರಂತೆ ಇರವುದಿಲ್ಲ. 2024 ರ ಲೋಕಸಭೆ ಚುನಾವಣೆ ವೇಳೆ ವಿಜಯಪುರ ಎಪಿಎಂಸಿ ವ್ಯಾಪಾರಸ್ಥರಿಗೆ ಹಣ ಕೊಡಿ ಎಂದು ತೊಂದರೆ ಕೊಟ್ಟಿದ್ದ. 190 ಜನ ವ್ಯಾಪಾರಸ್ಥರ ಅಂಗಡಿಗೆ ಬೀಗ ಹಾಕುವೆ ಎಂದು ಹೇಳಿದ್ದ. ವಿಜಯಪುರದ ಎಪಿಎಂಸಿ ವ್ಯಾಪಾರಿಗಳಿಗೆ ತೊಂದರೆ ಕೊಟ್ಟಿದ್ದ. ಈತ ಕರ್ನಾಟಕದ ಎಪಿಎಂಸಿ ಸಚಿವರೋ ವಿಜಯಪುರ ಎಪಿಎಂಸಿ ಸಚಿವರೋ ಎಂದು ಅವರು ಟಾಂಗ್ ನೀಡಿದರು.
ಶಿವಾನಂದ ಪಾಟೀಲ ನಂಬಿಕೆಗೆ ಅರ್ಹನಲ್ಲ. ಆತ ಹಿಂದೂ ಎಂದು ಶಾಸಕ ಬಸನಗೌಡ ಪಾಟೀಲ ಯತ್ನಾಳ ವಾಗ್ದಾಳಿ ನಡೆಸಿದರು.
